ದೂದ್ ಸಾಗರ್ ಇರುವ ಬ್ರಗಾಂಜಾ ಘಾಟ್ ಬಗ್ಗೆ ತಿಳಿದಿದೆಯೇ?

ಭೂಮಿ ಮೇಲಿನ ಸ್ವರ್ಗ ಕರ್ನಾಟಕ- ಗೋವಾ ರಾಜ್ಯಗಳ ಗಡಿಯಲ್ಲಿರುವ ದೂಧ್ ಸಾಗರ ಜಲಪಾತ ನೋಡುವ ಸಂಭ್ರಮ ವರ್ಣಿಸಲು ಸಾಧ್ಯವೇ ಇಲ್ಲ. ಸೇತುವೆ ಕೆಳಗಿಂದ ಜಲಪಾತ ಹರಿಯುವುದನ್ನು ನೋಡುವಾಗ ಮೈ ರೋಮಾಂಚನಗೊಳ್ಳುತ್ತದೆ. ಅಂಥ ಅದ್ಬುತ ಸ್ಥಳದ ಹಿನ್ನೆಲೆ ಕೇಳಿದರೆ ಅಚ್ಚರಿಯಾಗದೆ ಇರದು.

ವಾಸ್ತವದಲ್ಲಿ ದೂಧ್ ಸಾಗರ್ ಜಲಪಾತ ಹರಿಯುವುದು ಬ್ರಗಾಂಜಾ ಘಾಟ್ ನಲ್ಲಿ. ಘಾಟ್ ಎಂದರೆ ಮರಾಠಿಯಲ್ಲಿ ಗುಡ್ಡ ಎನ್ನುವ ಅರ್ಥ ಬರುತ್ತದೆ. ಬ್ರಗಾಂಜಾ ಘಾಟ್ ನಲ್ಲಿಯೇ ಜಲಪಾತದ ಮೇಲೆ ರೈಲ್ವೆ ಸೇತುವೆ ನಿರ್ಮಿಸಲಾಗಿದೆ. ಸೇತುವೆ ಮೇಲೆ ರೈಲು ಹೋಗುವುದನ್ನು ನೋಡಲು ಎರಡು ಕಣ್ಣು ಸಾಲದು.

ಅಂದಹಾಗೆ ಆ ಸ್ಥಳಕ್ಕೆ ಬ್ರಗಾಂಜಾ ಘಾಟ್ ಎಂದು ಹೆಸರು ಬಂದಿದ್ದಕ್ಕೂ ಕಾರಣವಿದೆ. ಈ ಬ್ರಗಾಂಜಾ ಘಾಟ್ ಗೋವಾ- ಕರ್ನಾಟಕ ಗಡಿಯಲ್ಲಿ ಪಶ್ಚಿಮ ಘಟ್ಟದಲ್ಲಿದೆ. ಇದು ಕರ್ನಾಟಕದ ಕ್ಯಾಸಲ್ ರಾಕ್ ನಿಂದ ಗೋವಾದ ಕುಲೆಮ್ ವರೆಗೆ ವಿಸ್ತರಿಸಿದೆ.

ಬ್ರಗಾಂಜಾ ಎನ್ನುವುದು 1640-1910ರವರೆಗೆ ಪೋರ್ಚುಗಲ್ ಅನ್ನು ಆಳಿದ ರಾಜವಂಶದ ಹೌಸ್ ಆಫ್ ಬ್ರಗಾಂಜಾಗೆ ಮೂಲವಾಗಿದೆ. ಈ ರೈಲು ಸಂಪರ್ಕವು ಪೋರ್ಚುಗಲ್ ಭಾರತವನ್ನು ಆಳಿದ ಮತ್ತು ಬ್ರಿಟೀಷರು ಭಾರತವನ್ನು ಆಳಿದ ನಡುವಿನ ಮೊದಲ ಅಂತಾರಾಷ್ಟ್ರೀಯ ರೈಲು ಸಂಪರ್ಕಗಳಲ್ಲಿ ಒಂದಾಗಿದೆ.

ಹಾಗಾಗಿ ಈ ಪ್ರದೇಶಕ್ಕೆ ಬ್ರಗಾಂಜಾ ಘಾಟ್ ಎನ್ನುವ ಹೆಸರು ಬಂದಿದೆ ಎಂದು ಹೇಳಲಾಗುತ್ತಿದೆ. ದೂದ್ ಸಾಗರ್ ಜಲಪಾತದ ಮೇಲೆ ನಿರ್ಮಿಸಿರುವ ಸೇತುವೆ ಮೇಲಿನ ರೈಲು ಹಳಿಯನ್ನು ನೈರುತ್ಯ ರೈಲ್ವೆ ವಿಭಾಗವು ನಿರ್ವಹಿಸುತ್ತದೆ. ಇಲ್ಲಿ ಚಿರತೆ, ಕಾಡುಕೋಣಗಳ ಓಡಾಟವೂ ಇದೆ.

ಜಲಪಾತ ನೋಡುವುದು ಹೇಗೆ?
ಕೊರೊನಾ ಕಾರಣದಿಂದ ದೂದ್ ಸಾಗರ್ ಜಲಪಾತ ವೀಕ್ಷಣೆಗೆ ಸಮಸ್ಯೆ ಉಂಟಾಗಿದೆ. ರೈಲು ಹಳಿಗಳ ಮೇಲೆ ನಡೆದಾಡುತ್ತ ಹತ್ತಿರದಿಂದ ಜಲಪಾತ ವೀಕ್ಷಣೆ ಮಾಡುವ ಭಾಗ್ಯ ಸದ್ಯಕ್ಕೆ ಇಲ್ಲ. ಹಾಗಾರೆ ಜಲಪಾತ ನೋಡಲು ಅವಕಾಶವೇ ಇಲ್ಲವೇ? ಎಂದು ಹೌಹಾರುವ ಅಗತ್ಯ ಇಲ್ಲ.

ಇದೇ ಮಾರ್ಗದಲ್ಲಿ ವಾಸ್ಕೊ ನಿಜಾಮುದ್ದೀನ್ ರೈಲೊಂದು ಸಂಚರಿಸುತ್ತಿದೆ. ಈ ರೈಲು ಗೋವಾದ ಮಡಗಾಂವ್ ನಿಂದ ಲೋಂಡಾ ಮಾರ್ಗವಾಗಿ ಸಾಗುತ್ತದೆ. ಮೈದುಂಬಿ ಹರಿಯುತ್ತಿರುವ ಜಲಪಾತದ ಸೌಂದರ್ಯ ತುಂಬಿಕೊಳ್ಳುವ ಆಸೆ ಇದ್ದರೆ ಈ ರೈಲಿನಲ್ಲಿ ಪ್ರಯಾಣಿಸಬಹುದು. ಆದರೆ, ಮರಳಿ ಬರಲು ರೈಲು ವ್ಯವಸ್ಥೆ ಇಲ್ಲ. ಹಾಗಾಗಿ ಸದ್ಯ ಪ್ರವಾಸ ಯೋಗ್ಯವಲ್ಲ.

ಮತ್ತಷ್ಟು ಪ್ರವಾಸ ವರದಿಗಳು

• ಹೆಣ್ಣು ಮಗು ಹುಟ್ಟಿದರೆ 111 ಗಿಡ ನೆಡುವ ಗ್ರಾಮ
• ಕುಣಬಿಗಳ ನಾಡಿನ ವಿಶೇಷ ಗಡ್ಡೆ ಗೆಣಸು
• ಅರಣ್ಯದೊಳಗೆ ಅವಿತುಕೊಂಡಿದೆ ರೋಚಕ ಇತಿಹಾಸದ ಜೈನರ ನೆಲೆ
• ಲಾಕ್ ಡೌನ್: ಮನೆಯಲ್ಲಿ ನೆಮ್ಮದಿಯ ದಿನ ಕಳೆಯಲು 10 ಉಪಾಯಗಳು